Exodus 21

1Nansi imithetho elizayethula phambi kwabo:

Izisebenzi zesiHebheru

2“Ungathenga isisebenzi sesiHebheru kumele sikusebenzele okweminyaka eyisithupha. Kodwa emnyakeni wesikhombisa kuzamele usikhulule kungelanhlawulo. 3Nxa sifike sodwa, kumele sikhululwe sisodwa kodwa nxa silomfazi ekufikeni kwaso kumele sihambe laye.

4Uma umqatshi waso angasipha umfazi asizale-le amadodana lamadodakazi, owesifazane labantwabakhe bazakuba ngabomqatshi, njalo indoda izazihambela yodwa ikhululekile.

5“Kodwa uma isisebenzi singathi, ‘Ngiyayithanda inkosi yami lomkami labantwabami, njalo kangifuni kukhululwa,’

6umqatshi waso kumele asihambise kubahluleli. Uzasisa emnyango kumbe emgubazini abesesiklekla izindlebe zaso ngosungulo yikho-ke sizakuba yisisebenzi okwempilo yaso yonke.

7“Nxa indoda ingathengisa indodakazi yayo njengesisebenzi indodakazi kayingakhululeki njengalokho okwenza izisebenzi zesilisa. 8Uma singathokozisi umniniwaso oyabe esikhethile ukuze sibe ngesakhe kumele asiyekele sihlengwe. Akalamvumo yokusithengisa kwabezizwe, ngoba esikhohlisile.

9Angasikhethela indodana yakhe kumele asinike amalungelo alingana lawendodakazi yakhe. 10Angathatha omunye umfazi akumelanga asincitshe ukudla, izigqoko lamalungelo okuthathwa.

11Angayekela ukusipha izinto lezi ezintathu sikhululekile ukuthi sizihambele kungahlawulwanga mali.

Imithetho ngabalimazanayo

12“Wonke umuntu otshaya omunye ambulale laye kumele abulawe. 13Kunjalo nje nxa engakwenzanga ngabomo, kodwa uNkulunkulu evumele ukuba kwenzakale, kumele abalekele endaweni engizayiqamba.

14Kodwa umuntu angaceba ukubulala omunye ngabomo, msuseni e-alithareni lami liyembulala.

15“Wonke umuntu ohlasela uyise kumbe unina kumele abulawe.

16“Wonke umuntu othumba omunye abesemthengisa kumbe aficwe elaye kumele abulawe.

17“Wonke umuntu othuka uyise kumbe unina kumele abulawe.

18“Nxa amadoda angaxabana omunye abesetshaya omunye ngelitshe kumbe ngenqindi, angafi kodwa agule alale phansi,

19lowo ophose inqindi kasoze anikwe umlandu nxa omunye angavuka abesehambahamba ephethe intonga yakhe; lanxa kunjalo kumele ahlawule indoda elimeleyo ngokulahlekelwa yisikhathi njalo ayelaphise.

20“Uma umuntu angatshaya isigqili sakhe sesilisa kumbe esesifazane ngomqwayi isigqili besesisifa ngenxa yalesisenzo, kumele ajeziswe,

21kodwa kasoze ajeziswe uma isigqili singasila ngemva kwelanga elilodwa kumbe izinsuku ezimbili, ngoba isigqili siyimpahla yakhe.

22“Uma amadoda alwayo angatshaya umfazi ozithweleyo abesebeletha isikhathi sakhe singakafiki, kodwa engalimaanga kakubi, owonileyo kumele ahlawuliswe lokho okuyabe kubizelwe yindoda yomfazi kwasekuvunywa ngumthethwandaba. 23Kodwa kungaba lokulimala okubi, kumele impilo ikhwitshizwe ngempilo, 24ilihlo ngelihlo, izinyo ngezinyo, isandla ngesandla, unyawo ngonyawo.

25Ukutshiswa ngokutshiswa, isilonda ngesilonda ukulimala ngokulimala.

26“Uma umuntu angatshaya isigqili sakhe sesilisa kumbe esesifazana elihlweni alipatshaze, kumele asiyekele isisebenzi sizihambele kube yinhlawulo yelihlo.

27Angatshaya akhumule izinyo lesigqili sesilisa kumbe esesifazana, kumele asiyekele isisebenzi sizihambele kube yinhlawulo yezinyo.

28“Uma inkunzi ingahlaba indoda kumbe umfazi afe, leyonkunzi kumele itshaywe ngamatshe ize ife njalo inyama yayo kayingadliwa. Kodwa umnikazi wenkunzi akumelanga etheswe umlandu. 29Kodwa nxa inkunzi ivele ilomkhuba wokuhlaba abantu, njalo umnikazi eseke wakhuzwa kodwa wayekela ukuyivalela ibisibulala indoda kumbe umfazi, inkunzi kumele ibulawe ngamatshe lomnikazi laye abulawe. 30Kodwa kungathiwa kahlawule angahlenga impilo yakhe ngokubhadala lokho okuyabe kubiziwe. 31Umthetho lo uyasebenza njalo uma inkunzi ingahlaba indodana kumbe indodakazi. 32Uma inkunzi ingahlaba isigqili sesilisa kumbe esesifazana, umnikazi kumele ahlawule amashekeli angamatshumi amathathu esiliva kumnini wesigqili, njalo inkunzi kumele ibulawe ngamatshe.

33“Uma umuntu etshiya umgodi ukhamisile, loba esimba umgodi angawusibekeli kukhalakathele kuwo inkabi ingabe ubabhemi,

34umninimgodi kahlawule; kahlawule umnikazi, isifuyo esifileyo besesisiba ngesakhe.

35“Uma inkunzi yomuntu ingalimaza eyomunye kuzamele ukuthi bathengise leyo ephilayo, babelane imali lesidumbu saleyo efileyo ngokulinganayo. 36Kodwa nxa kusaziwa ukuthi inkunzi ivele ilomkhuba wokuhlaba ezinye, kodwa umnikazi engayivaleli esibayeni, umnikazi kumele ahlawule isifuyo ngesinye isifuyo, njalo isifuyo esifileyo sizakuba ngesakhe.